Rus alimin Böyük Qafqazla bağlı bu kəşfi hər kəsi heyrətə gətirdi

Rusiyalı alim Dmitri Ruban heyrətamiz bir kəşf edib.

Onun fikrincə, dinozavrlar dövründə müasir Böyük Qafqazın yerində tropik dənizlərlə əhatə olunmuş qayalıq ada olub.

Alimin sözlərinə görə, bu əsrarəngiz ada Trias dövründən başlayaraq son Yura dövrünə qədər, yəni 50 milyon ildən çox mövcud olub. Bu müddət ərzində adanın konturları periodik olaraq dəyişib, lakin o Qafqazın qədim ekosisteminin mühüm hissəsi olaraq qalmaqdadır.

Geoloqlar Mezozoy erasında Qafqazda ada torpaqlarının mövcudluğunu çoxdan ehtimal edirdilər, lakin bu adaların yeri, sayı və ölçüsü haqqında dəqiq məlumat yox idi. Dmitri Ruban təxminən bir əsr əvvəlki məlumatlara və az öyrənilmiş ərazilərdə aparılan yeni çöl tədqiqatlarına əsaslanaraq, yalnız qədim adanın mövcudluğunu sübut etməklə qalmayıb, həm də onun sahil xəttini izləməyi bacarıb.

Ada tropik Qafqaz dənizində yerləşib və güclü maqmatik süxurlardan ‒ qranitoidlərdən ibarət olub. Onun qayalı sahilləri bitki örtüyü ilə örtülüb və ətrafdakı qayalarda hələ də bu örtüyün qalıqları mövcuddur.

Adanın ölçüləri milyonlarla il ərzində dəyişib, gah kiçilib, gah da yenidən böyüyüb, bəzən hətta digər quru massivləri ilə də birləşib.