Rusiyalı general evinin partladılması nəticəsində ağır xəsarət alıb

Rusiyanın nəzarəti altında olan “Luqansk Xalq Respublikası”nın baş gömrük zabiti general-mayor Yuri Afanasevskinin evi partladılıb. Bu vaxt separatçı general da evdə olub.

Bu barədə Ukrayna Təhlükəsizlik Xidməti məlumat yayıb.

“Vətənə xəyanətdə ittiham olunan general-mayor baş, boyun, qarın nahiyəsindən çoxsaylı qəlpə yaraları alıb və hazırda ağır vəziyyətdə reanimasiyadadır”, – deyə məlumatda bildirilib.

Qeyd edilib ki, Afanasevski Rusiya Federal Təhlükəsizlik Xidmətinin mərkəzi aparatının agentidir. O, “Luqansk Xalq Respublikası”nın qondarma rəhbəri Leonid Paseçnikin “maliyyəçisi” olması ilə tanınır.

Bildirilir ki, Afanasevski Ukraynaya qarşı döyüşən silahlı birləşmələri maliyyələşdirmək üçün çirkli pulları yuyub. O, Aİ, Böyük Britaniya, Kanada, İsveçrə və Yaponiyanın sanksiyalarına məruz qalıb.