Rusiyanın ehtiyatları tükənib?

Rusiya iqtisadiyyatını hərbiləşdirərək yeni imkanlar əldə etsə də, bu, eyni zamanda onun əsas zəif tərəfini üzə çıxarıb.

"Forbes"da yayımlanan məqalədə belə qeyd olunur.

Müəllifin fikrincə, Rusiyanın təcrid olunmuş və əsasən xammal sektoruna bağlı iqtisadiyyatı onu Çindən asılı vəziyyətə salıb.

Nəşrin yazdığına görə, Rusiyaya yüksək texnologiyaların təxminən 90 faizi məhz bu ölkədən gətirilir.

Məqalədə Avropa üçün əsas vəzifə Rusiyanın zəif iqtisadiyyatını daha da çətin vəziyyətə salmaq təklif olunur. Əmək və istehlak bazarı, eləcə də bank sektoru bu baxımdan ən həssas sahələrdir.

Finlandiya Prezidenti Aleksandr Stubbun sözlərinə görə, Avropanın qəbul etdiyi 19-cu sanksiya paketi artıq Rusiyanın iqtisadiyyatına ciddi təsir göstərir.

"Onların ehtiyatları tükənib. İnflyasiya və faiz dərəcələri 20 faizi keçir. İqtisadi artım ya sıfır, ya da mənfidir. Vergiləri artırmaq məcburiyyətində qalacaqlar. Rusiya müharibənin iqtisadi qiymətini görür", ‒ deyə Finlandiya Prezidenti vurğulayıb.

ABŞ Prezidenti Donald Tramp da oxşar mövqe ifadə edərək bildirib ki, Moskva milyonlarla dollarını bombalara və raketlərə xərcləsə də, Ukrayna ərazisində nəzərəçarpacaq irəliləyiş əldə edə bilməyib.

O, Rusiyanın iqtisadiyyatını "cəhənnəmə yuvarlanan" bir sistem kimi xarakterizə edib.