Senatorun qarşısına iki seçim qoyuldu | Menendez qərarını verdi

Ermənilərin himayədarı kimi tanınan ABŞ-nin Nyu-Cersi ştatından olan senatoru Robert Menendez istefa verib.

O, artıq istefa ərizəsini Senata təqdim edib. Bu barədə Demokratlar Partiyasının yaydığı bəyanatda bildirilib.

Yerli medianın məlumatına görə, senatorun qarşısına 2 seçim qoyulub: Öz istəyi ilə qurumu tərk etmək və ya Senatdan qovulmaq.

O da 1-ci versiyanı seçmək qərarına gələrək sözügedən ərizəni yazmaq məcburiyyətində qalıb. Beləliklə, ermənilərin “qoruyucusu” adını almış Robert Menendezin rəsmi olaraq fəaliyyəti avqustun 20-də sonlanacaq.

Korrupsiyada və xarici agent kimi işləməkdə ittiham olunan senator isə heç vaxt ictimai andı pozmadığını və ölkəsinə xəyanət etmədiyini söyləyib:

“Münsiflər heyətinin qərarına görə çox təəssüf edirəm. Mən inanıram ki, qanun və faktlar bu qərarı dəstəkləməyəcək və apellyasiya şikayəti veriləcək. Mən heç vaxt ictimai andımı pozmamışam. Mən yalnız ölkəm üçün çalışmışam və vətənpərvər olmaqdan başqa heç bir yola əl atmamışam. Eyni zamanda mən xarici agent kimi fəaliyyət də göstərməmişəm. Fikrimcə, münsiflər heyətinin verdiyi qərar ABŞ Senatının hər bir üzvünü riskə atacaq".

Məlumat üçün bildirək ki, R.Menendez rüşvətxorluq, qəsb, fırıldaqçılıq, xarici agent kimi fəaliyyət göstərmək və qanuna qarşı çıxmaq kimi maddələr də daxil olmaqla ümumilikdə 16 maddə üzrə təqsirli bilinib.

İttihamlara görə, o, həyat yoldaşı ilə birgə külli miqdarda qızıl, yüz minlərlə dollar nağd pul, bahalı avtomobillər alıb. Yerli medianın məlumatına görə, 16 ittihama görə onu maksimum 222 il həbs cəzası gözləyir.

Maraqlısı budur ki, bu, 2006-cı ildən bəri ABŞ Konqresinin Nümayəndələr Palatasında və Senatda çalışan senatorun ilk belə məhkəməsi deyil. R.Menendez 2015-ci ildə də vəzifə səlahiyyətlərindən sui-istifadə etməkdə ittiham edilib. Lakin 2017-ci ilin noyabrında keçirilən məhkəmədə o, bütün ittihamları rədd edib. Məhkəmə heyətinin hökm çıxara bilməməsi və hər 2 tərəfin iddiaları yalanlaması səbəbindən bu proses yalnız araşdırma ilə nəticələnib.