Serbiyada etirazlar | Aleksandar Vuçiçi devirmək istəyirlər?

Dekabrda baş tutan parlament seçkilərində Aleksandar Vuçiçin rəhbərlik etdiyi koalisiyanın qalib gəlməsi paytaxt Belqradda iğtişaşlara səbəb olub. Etirazçılar Vuçiçi inqilab yolu ilə devirmək istəyirlər.

Aysberqin görünməyən tərəfində isə Qərbin Gürcüstan, Ukrayna, Qırğızıstan, Ermənistan, Suriya və s. ölkələrdə həyata keçirdiyi rəngli inqilablar ssenarisinin Serbiyada təkrarlandığını görürük.

Əslində Serbiya 2012-ci ildən Aİ üzvlüyünə namizəddir. Lakin Serbiyanın Rusiya ilə müttəfiqlik münasibətlərində olması, Rusiya-Ukrayna müharibəsi başlayandan Qərbin apardığı anti-Rusiya təbliğatına qoşulmaması və xarici siyasətdə Vuçiçin tarazlığı qoruması onun hədəf seçilməsini şərtləndirdi. Qərb israrla Rusiyanın bütün cəbhələrdə mövqeyini zəiflətmək siyasətini hər vəchlə davam etdirir.

Digər tərəfdən, uzun illərdir, albanların rəhbərlik etdiyi Kosova hökuməti ilə etnik azlıq olan serblər arasında gərginlik davam edir. 2008-ci ildə birtərəfli qaydada Kosova müstəqilliyini elan etsə də, Aleksandar Vuçiç Kosovanın müstəqilliyini heç vaxt tanımayacağını bəyan edib.

Bənzər problemi 30 il ərazində ölkəmiz də yaşayıb. Amma Azərbaycan müstəqil siyasət yürüdərək, ərazilərimizin uzun illər erməni işğalında qalmasına susan Qərbin bütün planlarını alt-üst etdi.

Qərb Ukrayna müharibəsində də gözlənilən nəticəni əldə edə bilmədi. Eləcə də ənənəvi plan Cənubi Qafqazda da puç oldu. Çünki dünya xalqları artıq öz müqəddəratlarını təyin etmək iqtidarına malik siyasi iradədədirlər. Qərb artıq anlamalıdır ki, ənənəvi inqilab ssenariləri yeni dünya düzənini formalaşdırmaq gücündə deyil.