Sifarişlə qətl törədən məhkumun axırına çıxacaqlar | ABŞ-dən qəddar addım

ABŞ-də ilk dəfə qeyri-insani ölüm cəzası tətbiq ediləcək.

Yerli medianın yaydığı məlumata görə, edam azot inhalyasiyası ilə həyata keçiriləcək.

Bu cəza formasının ilk qurbanı isə məhkum 58 yaşlı Kennet Smit olacaq. O, 1988-ci ildə sifarişli qətl törətməkdə təqsirli bilinir. Edamın 2024-cü il yanvarın 25-də Alabama ştatının Penitensiarında həyata keçirilməsi planlaşdırılır.

Qeyd olunub ki, həmin an məhkumun üz nahiyəsinə qaz balonuna qoşulmuş maska taxılacaq. BMT Baş Assembleyasının rəsmiləri bu addımın 1984-cü il dekabrın 10-da qəbul edilən konvensiyaya əsasən, beynəlxalq standartlara zidd olduğunu bildirib.

Ekspertlər isə hesab edirlər ki, ABŞ hakimiyyəti bu cəza tədbirindən istifadə etməklə məhkumlara qarşı qəddar, qeyri-insani və ya ləyaqətini alçaldan addım atır.

Qeyd edək ki, bu edam növü ilə məhkum yalnız azotla nəfəs alır və o, oksigendən məhrum edilir. Hazırda ABŞ-nin üç ştatında bu cəza üsuluna icazə verilsə də, praktiki olaraq heç vaxt istifadə olunmayıb.