Tehran və Vaşinqton nüvə danışıqları ilə bağlı qərar verdi? - İran rəsmisindən mühüm açıqlama

Dünya gündəmində olan mövzulardan biri də İran ilə ABŞ arasındakı danışıqlardır.

Tehran tərəfi Vaşinqtonla danışıqların altıncı raunduna dair qərarın hələ verilmədiyini açıqlayıb.

İranın Xarici İşlər Nazirliyinin sözçüsü İsmayıl Bəqainin sözlərinə görə, nüvə proqramı ilə bağlı fikir ayrılıqlarını həll etmək üçün müvafiq vaxtda növbəti görüşün tarixi və yeri ictimaiyyətə bildiriləcək.

İ.Bəqai Tehranın Oman vasitəsilə Vaşinqtona qərarını ötürəcəyini deyib.

Qeyd edək ki, İran və ABŞ nümayəndələri mayın 23-də Romada İranın nüvə proqramı ilə bağlı fikir ayrılıqlarını aradan qaldırmaq üçün danışıqların beşinci raundunu keçiriblər.

Tərəflər arasında vasitəçilik edən Oman tərəfindən müəyyən, lakin yekun olmayan razılığın əldə olunduğu açıqlanıb. Daha əvvəl ABŞ İrana təklifini göndərsə də, Tehran hakimiyyəti bunu qəbuledilməz adlandırıb.

İyunun 7-də isə Prezident Donald Tramp İrana uranı zənginləşdirməməsi ilə bağlı xəbərdarlıq edib. Əks halda Vaşinqtonun nəticələri ilə üzləşməli olduqlarını bəyan edib.

Bundan əlavə, rəsmi Tehran bildirir ki, Qərb İrana qarşı təzyiq göstərsə də, İsrailin nüvə proqramına göz yumur. Təl-Əviv tərəfi isə bu ittihamları nə təsdiq, nə də təkzib edir.