Təqdimetmə mərasimində Narendra Modi iştirak edib

Hindistanda ölkənin ilk hidrogenlə işləyən qatarı istifadəyə verilib.

Təqdimetmə mərasimində Baş nazir Narendra Modi də iştirak edib.

Qatar ölkənin şimalındakı Haryana ştatında yerləşən 89 kilometrlik Cind-Sonipat marşrutu üzrə hərəkət edəcək.

Bu, Hindistanda yerli mütəxəssislər tərəfindən hazırlanmış hidrogen yanacaq elementi texnologiyasının ilk dəfə dəmir yolu nəqliyyatında tətbiqidir.

Texnologiya hidrogen və oksigenin reaksiyası nəticəsində elektrik enerjisi istehsal edir. Bu proses zamanı yalnız su buxarı və istilik yaranır ki, bu da onu dizel qatarlarına nisbətən daha ekoloji təmiz edir.

Bu layihə ilə Hindistan hidrogenlə işləyən qatarlardan istifadə edən Çin, Almaniya, Yaponiya və ABŞ kimi ölkələr sırasına qoşulub.

10 vaqondan ibarət qatarın maksimal istismar sürəti saatda 75 kilometr, layihə üzrə nəzərdə tutulan maksimal sürəti isə saatda 110 kilometrdir. Qatar təxminən 2 600 sərnişin daşımaq imkanına malikdir.