Terror təşkilatının lideri müəmmalı şəkildə öldü

“Əl-Qaidə”nin Yəmən qolunun lideri Xalid bin Ömər Batarfi ölüb.

Bu barədə terror təşkilatlarının monitorinqini aparan ABŞ-nin “SITE Intelligence Group” şirkəti məlumat yayıb.

“Əl-Qaidə” qruplaşması da faktı təsdiqləsə də, onun ölüm səbəbini açıqlamayıb. Terror təşkilatının xəbərinə görə, Saad bin Atef əl-Avlaki qrupun yeni lideri olacaq.

Məlumat üçün bildirək ki, fərqli təxəllüslərlə tanınan Əl-Batarfi “Əl-Qaidə”nin Ərəbistan yarımadasında fəaliyyət göstərən qoluna rəhbərlik edib. AQAP qısaltması ilə tanınan qrup "Əl-Qaidə"nin hələ də fəaliyyət göstərən ən təhlükəli qolu hesab olunur.

2018-ci ilin yanvarında isə adıçəkilən qruplaşma lideri ABŞ Dövlət Departamenti tərəfindən xüsusi kateqoriyalı beynəlxalq terrorçu kimi tanınıb. Bu səbəbdən də onun ABŞ-nin yurisdiksiyasında olan bütün əmlak və bank hesabları müsadirə edilib.

Qeyd edək ki, Ağ Ev Xalid əl-Batarfi barəsində dəqiq koordinasiyalı məlumat verənlərə 5 milyon dollar mükafat vəd etmişdi.