Təyyarə qəzasında həlak olanların ailələrindən ürək dağlayan görüntülər

Gürcüstan ərazisində qəzaya uğrayan Türkiyə Hərbi Hava Qüvvələrinə məxsus “C-130” hərbi yük təyyarəsindəki hərbçilərin şəhid olma xəbərləri ailələrinə verilib.

37 yaşlı baş çavuş Emrah Kuranın ailəsinə şəhadət xəbərini verən əsgərin “Osman əmi, artıq bir şəhid atasısan” sözləri ürəkləri dağlayıb. Emrah Kuranın ailəli və 3 övlad atası olduğu bildirilib.

Şəhid olanlar arasında pilot, mayor Serdar Uslu da var. Onun həyat yoldaşının hamilə olduğu və cütlüyün 4 ay sonra körpələrinin dünyaya gələcəyi deyilir.

Üzücü xəbər Tekirdağda şəhid baş çavuş İlker Aykutun da ailə evinə çatdırılıb. Şəhidin atası Ünal Aykut əsgərləri qucaqlayıb və “siz də mənim oğullarımsınız” deyib. 39 yaşlı İlker Aykutun ailəli və bir oğul atası olduğu bildirilib.

Xatırladaq ki, noyabrın 11-də Azərbaycandan Türkiyəyə istiqamətlənən, “C-130” tipli hərbi nəqliyyat təyyarəsi Gürcüstan ərazisində qəzaya uğrayıb. Qəza nəticəsində təyyarədə olan 20 nəfərin hamısının həyatını itirdiyi bildirilir.