Tramp Putinə nələr deyəcəyini bir-bir sadaladı | Alyaska görüşünün detalları

ABŞ Prezidenti Donald Tramp ukraynalı həmkarı Volodimir Zelenski və avropalı müttəfiqlərinə Rusiya Prezidenti Vladimir Putinlə Ukraynanın bölünməsini müzakirə etməyəcəyini deyib.

“NBC News” mənbələrinə istinadən məlumat yayıb ki, Tramp Avropa liderlərinə Putinlə Alyaskada görüşməkdə məqsədinin Ukraynada atəşkəs olduğunu bildirib.

Tramp və Avropa liderləri Ukraynada sülh danışıqlarına başlamazdan əvvəl atəşkəsin əldə edilməli olduğuna dair razılıq əldə ediblər.

Bundan başqa, Fransanın Avropa və xarici işlər naziri Jan-Noel Barro avqustun 13-də keçirilən videokonfransdan sonra ABŞ Prezidenti Donald Trampın Alyaskada Rusiya lideri Vladimir Putindən qeyd-şərtsiz atəşkəs tələb edəcəyini və digər tərəfdaşlarla birlikdə Ukraynaya təhlükəsizlik zəmanəti vəd edəcəyini qeyd edib.

Barronun sözlərinə görə, ABŞ-nin, Fransa, Böyük Britaniya və Almaniyanın birləşdirdiyi könüllü ölkələrin koalisiyası tərəfindən hazırlanmış təhlükəsizlik zəmanətlərinə qoşulacağı gözlənilir.