Turistlər hadisə zamanı yatıbmış | Hindistanda faciə

Hindistanın cənubundakı Andhra-Pradeş ştatında turist avtobusunda baş verən yanğın zamanı azı 20 nəfər ölüb.

Hadisə Kaveri Travels şirkətinin təxminən 44 sərnişinlə Heydərabaddan Banqalor şəhərinə gedən avtobusunun magistral yolda motosikletə çırpılması nəticəsində baş verib.

Polis bildirib ki, ikitəkərli nəqliyyat vasitəsi avtobusun altına ilişərək yanacaq çəninə dəyib, bu isə dərhal partlayışa və avtobusda alovun sürətlə yayılmasına səbəb olub.

Qəza baş verən zaman sərnişinlərin əksəriyyəti yatıb. Onların bəziləri oyanıb, pəncərələrin şüşələrini sındırıb və avtobusdan çıxıblar, lakin bir çoxu alovun bir neçə dəqiqə ərzində bürüdüyü avtobusun salonunda qalıb.

Yerli sakinlər hadisə yerinə tələsib və yanğınsöndürənlər gələnə qədər zərərçəkənləri xilas etməyə çalışıblar.

Polis qəzanın sürücünün ehtiyatsızlığı, yanğına isə yanacaq sızmasının səbəb ola biləcəyi ehtimalı ilə hadisənin səbəblərini araşdırmağa başlayıb.

Məlumata görə, avtobus sürücüləri qəzadan dərhal sonra hadisə yerindən qaçıblar. Həmin şəxslərin axtarışı aparılır.