Turistlərin marağını cəlb edən “çəhrayı göl”ün sirri nədir?

Seneqalın paytaxtı Dakardakı "çəhrayı göl" kimi tanınan “Lac Rose” üç illik rəng solmasından sonra yenidən özünəməxsus rəngi ilə ziyarətçiləri cəlb etməyə başlayıb.

Duz hasilatı və turizm vasitəsilə dolanan yerli sakinlər qeyd ediblər ki, son illərdə yağan güclü yağışlar gölün çəhrayı rənginin itməsinə və duzun çıxarılmasının mümkünsüz olmasına səbəb olub.

Ətraf mühit üzrə geoloq professor Pape Qoumba bu dəyişikliklərin səbəblərini izah edib.

"Göl iki səbəbə görə rəngini itirmişdi: yağış sularının verdiyi durulaşma və mikroorqanizmlərin inkişafında yaranan pozuntu. Yalnız rəng yox, duz hasilatında da ciddi azalma müşahidə olunurdu. İndi isə yağış suları olmadığı üçün göldə duzun konsentrasiyası artıb. Durulaşma azalıb, havalar çox isti olduğu üçün buxarlanma artıb. Beləliklə, göl tədricən əvvəlki duz tərkibini və rəngini bərpa etməyə başlayıb”, ‒ deyə professor qeyd edib.

Dakarın təxminən 35 kilometr şimal-şərqində yerləşən göl parlaq çəhrayı rəngi və yüksək duz tərkibi ilə məşhurdur. Təxminən 3 kvadratkilometr sahəyə və maksimum 3 metr dərinliyə malik olan “Lac Rose” 1970-ci illərdən bəri ölkədə əsas duz hasilatı məkanı sayılır.