Türkiyə Daxili İşlər Nazirliyindən müxalifətə xəbərdarlıq | Heç kim qanundan üstün deyil

“İctimai asayişin və millətimizin əmin-amanlığının pozulmasına, xalqın küçələrə çağırılmasına əsla icazə vermərik”.

Bunu Türkiyənin daxili işlər naziri Ali Yerlikaya sosial media hesabında etdiyi paylaşımda bildirib.

O, məhkəmə qərarlarını yox saymağın və xalqı küçələrə çıxmağa təşviq etməyə çalışmanın qanuna açıq şəkildə meydan oxumaq olduğunu vurğulayıb.

“Heç kim qanunlardan üstün deyil. Dövlət qanuna zidd olan hər cəhdə qarşı qətiyyətlə tədbir görəcək. İctimai asayişin və millətimizin əmin-amanlığının pozulmasına, xalqın küçələrə çağırılmasına əsla icazə vermərik”, ‒ deyə nazir bildirib.

Qeyd edək ki, Türkiyənin müxalifətdəki Cümhuriyyət Xalq Partiyasının İstanbul təşkilatının sədri və İdarə Heyətinin ehtiyat tədbiri olaraq vəzifələrindən uzaqlaşdırılması fonunda CXP partiya tərəfdarlarını etiraza səsləyib. İstanbul vilayət administrasiyası isə 6 rayonda mitinq və bütün kütləvi tədbirləri sentyabrın 11-nə qədər qadağan edib.

Bildirilib ki, sentyabrın 10-u yerli saatla 23:59-a qədər Beşiktaş, Beyoğlu, Eyüpsultan, Kağıthane, Sarıyer və Şişli rayonlarında bütün mitinq, mətbuat açıqlaması, açıq hava toplantıları, aksiyalar, çadır qurma, stend açma və bu qəbildən olan bütün kütləvi tədbirlər ləğv olunub. İstanbulda mitinqlərin qadağan olunmasından sonra CXP İstanbul Vilayət Təşkilatının qarşısında asayişin qorunması üçün polis qüvvələri cəlb edilib.