Türkiyə müxalifətində nə baş verir?

Türkiyədə yeni seçilmiş CHP sədri Özgür Özəlin keçmiş CHP-çilərə “ata evinə qayıt” çağırışı gündəmdədir.

Bolu Bələdiyyə Başçısı Tanju Özcan “99 faiz CHP-yə qayıdacağam” dediyi halda, CHP-dən ayrılaraq Məmləkət Partiyasını quran Məhərrəm İncənin atacağı addım maraq doğurur. CHP sədri Özgür Özəl bu çağırışı etdikdən sonra bütün gözlər Kamal Kılıçdaroğlu dövründə CHP-dən ayrılan və ya xaric edilən adlardadır.

Bolu Bələdiyyə Başçısı Tanju Özcan Kılıçdaroğlunu tənqid etdikdən sonra CHP-dən xaric edilib. Özəlin zəngindən sonra Tanju Özcan partiyaya yenidən üzv olmaq üçün müraciət edib.

Özcan Məmləkət Partiyasının sədri Məhərrəm İncənin də CHP-yə qayıtmasını arzuladığını bildirib: “Keçən gün İncə bəylə telefonda danışdıq. Onun qayıdıb-qayıtmayacağı ilə bağlı dəqiq danışmadıq, amma məncə, qayıtmalıdır. Məhərrəm İncə də partiyaya qayıtsa, çox şad olaram”.

Bəs Məhərrəm İncə CHP-yə qayıdacaqmı?

“CNN TÜRK”ə danışan Vətən Partiyasının sözçüsü İpek Özkal Sayan CHP-dən Məhərrəm İncəyə rəsmi dəvət göndərilmədiyini vurğulayıb: “Məhərrəm İncə bir partiyanın sədridir. Biz partiyayıq. Rəsmi dəvət olsa, cavab veriləcək”.

Bazar günü Məmləkət Partiyasının yerli seçki gündəmi ilə Məclisi keçiriləcək. Həmin görüşdən sonra CHP-dən təklifin gəlib-gəlməyəcəyi maraq doğurur. Əldə edilən məlumata görə, Məmləkət Partiyasında Məhərrəm İncəyə yaxın insanlar CHP-yə qayıtmağı səbirsizliklə gözləyirlər.