Türklər Tatlısəsin qızını tənqid etdi: Qəzzaya görə matəm gününə etiraz

Türkiyəli sənətçi İbrahim Tatlısəsin müğənni qızı Dilan Çıtak Tatlısəs Qəzzada xəstəxanaya atılan raket nəticəsində həyatını itirənlər üçün Türkiyədə 3 günlük milli matəm elan edilməsinə etiraz edib.

Bu barədə o, sosial media hesabında yazıb. Belə ki, matəmə görə onun konserti təxirə salınıb.

"Matəm səbəbi ilə təsirlənən yeganə sektor niyə musiqi olmalıdır? Evləndirmək, təmizlik, yemək proqramları hələ də televizorda verilir. Musiqi sektorunda olanlar üçün işləmək lüks hesab olunur? Əgər milli matəmdirsə, onda televizorda təqdim olunan bütün yayımlara tətbiq olunmalıdır", – deyə ifaçı bildirib.

Dilanın paylaşımı sosial media izləyiciləri tərəfindən birmənalı qarşılanmayıb və tənqid olunub. İradların ardından o, yenidən paylaşım edib:

"Mən konsertlər dayandırılmasın demədim. Matəmdirsə, bütün millət tutmalıdır. Təkcə sənət deyil, futbol da televizorda yayımlanmamalıdır. Yoxsa başqa cür ancaq sənət yası olur və ədalətsiz şəkildə milli matəm adlandırılır".

Xatırladaq ki, daha əvvəl türkiyəli müğənni Zeynep Bastık da bununla bağlı etirazını “Instagram” hesabında bildirib və tənqid atəşinə tuş gəlib.

Qeyd edək ki, oktyabrın 17-si axşam saatlarında Qəzzada yerləşən xəstəxanaya raket zərbəsi endirilib. İsrail Ordusu hadisə ilə bağlı araşdırma aparıldığını və insidentin “İslami Cihad” qruplaşması tərəfindən uğursuz raket buraxılışı nəticəsində baş verdiyini bildirib.

Türkiyə Prezidenti Rəcəb Tayyib Ərdoğanın fərmanı ilə matəm ölkədə oktyabrın 21-i axşam bitəcək.