Ukrayna liderlər səviyyəsində danışıqlara hazırdır, bəs Rusiya?

“Almaniya 2026-cı ildə də Ukraynaya dəstəyini davam etdirəcək və birbaşa hərbi məqsədlərə 11,5 milyard avro yönəldəcək”.

Bu barədə Almaniyanın müdafiə naziri Boris Pistorius bəyan edib.

Onun sözlərinə görə, Almaniya müttəfiq ölkələrə Ukrayna üçün əlavə olaraq “PAC-3” hava hücumundan müdafiə komplekslərini tədarük etməyi təklif edib:

“Almaniya artıq çox sayda kompleks təqdim edib, lakin daha beş ədəd əlavə etməyi planlaşdırır. Bir çox ölkə buna qoşulmağa hazır olduğunu bildirib. Biz son təsdiqi gözləyirik. Onu da deyim ki, Ukraynanın dəstəklənməsi ilə yanaşı, əlbəttə, söhbət Avropanın öz müdafiə qabiliyyətinin daim yaxşılaşdırılmasından da gedir”.

Bu arada, Ukrayna Milli Təhlükəsizlik və Müdafiə Şurasının katibi Rustem Umerov İsveçrədə keçirilən görüşlərin nəticələri barədə açıqlama verib. O vurğulayıb ki, danışıqlar qrupunun ətraflı hesabatı təqdim olunub və müharibəni ləyaqətlə başa çatdırmaq üçün real imkanların qaldığı hesab edilir.

Katibin fikrincə, beynəlxalq ictimaiyyətin Rusiyaya təzyiq göstərmək qabiliyyəti etibarlı sülhün müharibəni əvəz olunmasına əhəmiyyətli dərəcədə kömək edə bilər:

“Fevral ayında daha bir danışıqlar raundunun təşkilinə və bu görüşün məhsuldar olacağına ümidvardırıq. Növbəti üçtərəfli görüş ərəfəsində Ukraynanın ən çətin suallara cavabları hazırdır və danışıqlar qrupunun prioritetləri müəyyən edilib”.

Rustem Umerov sonda əlavə edib ki, liderlər səviyyəsində görüş formatı həlledici rol oynaya bilər.