Ukrayna polisi diversiya fəaliyyətləri göstərməyə çalışanları ələ keçirdi

“Ukrayna polisi diversiya törətməyə cəhd edən 2968 nəfəri saxlayıb”.

Bunu Baku TV-nin Şərqi Avropa bürosuna müsahibəsində Ukrayna Milli Polisinin Baş Cinayət Axtarış İdarəsinin rəisi Vadim Dzyubinski bildirib.

“Rusiya xüsusi xidmət orqanlarının və digərlərinin maraqları ölkəmizdə daim dəyişir. Onların cəbhə xəttində fəaliyyət göstərən fəal diversiya qrupları var. Hər şey ofislərdə şkafların yandırılması ilə başladı.

Sonradan onlar hərbi maşınları, eləcə də Müdafiə Qüvvələrinə aid maşınları yandırmağa başladılar. Partlayıcı qurğuların quraşdırılması, hərbi komisarların inzibati binalarını partlatmağa cəhd, polis bölmələrinin yaxınlığında partlayıcı qurğuların işə salınması yeni təxribat növüdür. Ötən il 7 belə hadisə baş verib və onların hamısının üstü açılıb. Bütün cinayətkarlar saxlanılıb və bu diversantlarla Rusiya xüsusi xidmət orqanları arasında əlaqə də təsdiqlənib”, ‒ o vurğulayıb.

Qeyd edək ki, son vaxtlar Ukraynada diversiya fəaliyyətləri güclənib.