Ukrayna Vardanyanı niyə axtarır?

Rusiya sülhməramlılarının müvəqqəti nəzarətində olan Azərbaycan ərazilərinə Moskvanın xüsusi missiyası ilə göndərdiyi erməni əsilli iş adamı Ruben Vardanyan barəsində Ukraynada axtarış elan olunub.

Bildirilib ki, sanksiyalara məruz qalan şəxslər siyahısına daxil edilmiş Ruben Vardanyan dərhal saxlanılaraq Ukrayna və ya NATO ölkələrinin hüquq-mühafizə orqanlarına təhvil verilməlidir.

Ukraynalı ekspert Aleksandr Kovalenkonun sözlərinə görə, R.Vardanyan Ukraynanın sanksiyalar siyahısına 2022-ci ilin oktyabr ayında daxil edilib.

“Sözügedən xəbər Ukraynanın “Sülhməramlılar Mərkəzi” tərəfindən həmin şəxsin ölkənin milli təhlükəsizliyinə, sülhə, insan təhlükəsizliyinə və beynəlxalq asayişə qarşı qəsdən hərəkətlər törətməsi, habelə digər qanun pozuntularına yol verməsi barədə hüquq-mühafizə orqanlarına ünvanlanan müraciətdən ibarətdir. Ruben Vardanyan Kremlin adamıdır və Azərbaycanın Qarabağ ərazisində daim münaqişənin qızışdırılması ilə birbaşa əlaqəsi olan şəxsdir. O, eynilə nasist yanaşmasını Ukraynaya qarşı da nümayiş etdirir.

Bundan başqa, R.Vardanyan İranla da sıx əlaqədədir, İran isə Rusiyaya kamikadze dronları verir. O, Qarabağda və kənarda fəaliyyət göstərən hərbi cinayətkardır. İnterpola müraciət ediləcəyi təqdirdə onun beynəlxalq axtarışa verilməsi də istisna deyil”, – deyə ukraynalı ekspert bildirib.

Qeyd edək ki, R.Vardanyanın Qarabağdakı separatçı rejimə başçılıq etdiyi bildirilir.