Ukraynanı silkələyən hadisə | Zelenskinin “sağ əli” barədə qalmaqalın detalları üzə çıxdı

Ukrayna Prezident Ofisinin rəhbəri Andrey Yermakın evində axtarışlar aparılıb. Axtarış antikorrupsiya orqanları tərəfindən həyata keçirilib.

Buna səbəb “Enerqoatom” şirkətində 100 milyon dollarlıq korrupsiya ilə əlaqədar başladılan istintaqdır.

“Ukraynanın Milli Antikorrupsiya Bürosu və Xüsusi Antikorrupsiya Prokurorluğu Prezident Ofisinin rəhbərinə aid yerlərdə axtarış aparır”, – deyə məlumatda bildirilir.

Qeyd edək ki, Ukrayna Prezidenti Volodimir Zelenski ədliyyə və energetika nazirlərinin istefasını parlamentdən xahiş edəndə deputatlar onun Ofisinin rəhbəri olan Yermakın işdən azad olunmasını tələb ediblər. Bu tələbə müşahidəçi orqanlar da qoşulub. Çünki 100 milyonluq korrupsiya qalmaqalında Zelenskinin ən yaxın adamlarından olan Andrey Yermakın da adı hallanıb. Axtarışın nəticələri isə dekabrın əvvəlində açıqlana bilər.

Xatırladaq ki, Zelenskinin 2019-cu il seçkilərində qalib gəlməsindən sonra Yermak onun sağ əli olub və Kiyevdə Prezidentdən sonra ikinci ən nüfuzlu şəxs sayılıb. Ukraynanın Qərb müttəfiqləri ilə danışıqları da onun vasitəçiliyi ilə aparılır.

Qeyd edək ki, yay aylarında Zelenskinin Administrasiyası Milli Antikorrupsiya Bürosu və Xüsusi Antikorrupsiya Prokurorluğunun sərbəst fəaliyyətini dayandırıb bu qurumları Baş Prokurorluğun tərkibinə qatmağa çalışırdı. Bu isə etirazlara səbəb oldu.