Vatikanda Papa Fransiskin vida mərasimi keçirildi | Dövlət başçıları iştirak etdi

Vatikanda Roma Papası Fransiskin dəfn mərasimi keçirilir. Mərasimə dövlət və hökumət başçıları, ruhanilər və dünyanın müxtəlif yerlərindən gələn qonaqlar qatılıb.

İnsanlar Papa Fransisklə vidalaşmaq üçün aprelin 25-i günorta saatlarından etibarən Romadakı Müqəddəs Pyotr Bazilikasına axın edib. Xüsusi təhlükəsizlik tədbirləri görülüb. Vatikanın açıqladığı siyahıya əsasən, dəfn mərasimində müxtəlif dövlətlərdən və beynəlxalq təşkilatlardan 160-dan çox nümayəndə heyəti iştirak edir.

Qonaqlar arasında ABŞ Prezidenti Donald Tramp və həyat yoldaşı Melaniya, Avropa Komissiyasının sədri Ursula fon der Lyayen, Fransa Prezidenti Emmanuel Makron, Ukrayna Prezidenti Volodimir Zelenski və digər şəxslər var.

Son bir neçə gündə təxminən 250 minə yaxın insanın Papa ilə vidalaşmaq üçün Müqəddəs Pyotr Bazilikasını ziyarət etdiyi deyilir. Xarici mətbuatda verilən məlumatlarda bildirilir ki, mərasimdə 500 minə qədər adamın iştirakı gözlənilir. Papa öz vəsiyyətində heç bir xüsusi bəzəkləri olmayan sadə bir məzarda dəfn edilməsini istəyib.