Xərçəngin aşkarlanmasının qeyri-adi və sadə üsulu | Tibbi inqilab

Tokio Universitetinin alimləri xərçəng hüceyrələrini sağlam hüceyrələrdən ayırmağın yeni sadə üsulunu aşkar ediblər.

Araşdırmalar göstərib ki, hüceyrələrin hərəkət trayektoriyasına əsasən onların bədxassəli dəyişikliklərə məruz qalıb-qalmadığını 94%-ə qədər dəqiqliklə müəyyən etmək mümkündür.

Alimlər adi mikroskop altında rəngləmə tələb etməyən fazalı-kontrast mikroskopiya üsulu ilə xərçəngli fibrosarkoma və normal fibroblastların hərəkət davranışlarını müqayisə ediblər.

Məlum olub ki, xərçəng hüceyrələri fərqli şəkildə hərəkət edir. Belə ki, onlar daha tez-tez istiqamət dəyişir və hərəkətləri daha az hamar olur. Məhz bu xüsusiyyətlər sistemə bədxassəli hüceyrələri yüksək dəqiqliklə “tanımaq” imkanı verir.

Tədqiqatçılar qeyd ediblər ki, yeni yanaşma xərçəngin diaqnozunu daha sadə, sürətli və əlçatan edir. Bu üsulu baha avadanlıq olmadan belə əksər laboratoriyalarda tətbiq etmək mümkündür.