“Yaşıl kürələr”, “Uçan disklər” və “Alov topları” nədən xəbər verir?

ABŞ Müharibə Nazirliyi naməlum uçan obyektlərlə bağlı əvvəllər məxfi saxlanılan sənədlərin ikinci hissəsini yayımlayıb.

Sənədlərdə “yaşıl kürələr”, “uçan disklər” və “alov topları” kimi izahı verilməyən obyektlərlə bağlı məlumatlar yer alıb.

Sənədlərin açıqlanması barədə qərar ABŞ Prezidenti Donald Trump tərəfindən verilib.

“Reuters” agentliyinin yaydığı məlumata görə, ABŞ müharibə naziri Pit Heqset bildirib ki, “naməlum anomal hadisələr” adlandırılan obyektlərlə bağlı sənədlər, fotoşəkillər və videolar uzun illərdir müxtəlif fərziyyələrə səbəb olurdu.

“Amerika xalqının bunları öz gözləri ilə görməsinin vaxtıdır”, – deyə Heqset açıqlamasında bildirib.

Yayımlanan 222 sənəddən biri 1948-1950-ci illərdə ABŞ-nin Nyu-Meksiko ştatında yerləşən yüksək məxfilikli obyekt ətrafında qeydə alınmış müşahidələr və araşdırmalarla bağlı 116 səhifəlik materialdan ibarətdir.

ABŞ Müharibə Nazirliyinin məlumatına görə, həmin sənəddə hərbi baza yaxınlığında müşahidə olunan “yaşıl kürələr”, “disklər” və “alov topları” ilə bağlı 209 hadisə qeyd olunub.

Ekspertlər bildirirlər ki, ilk açıqlanan sənədlər bəzi məlum müşahidələrin yeni videolarını təqdim etsə də, yadplanetlərin və ya yer kürəsindən kənarda həyatın mövcudluğunu təsdiqləyən qəti sübut ortaya qoymayıb.

Qeyd edək ki, UNO hesabatlarının ictimaiyyətə təqdim olunması prosesi ilk dəfə 1970-ci illərin sonlarında başlayıb və Tramp bu addımı davam etdirən növbəti prezident olub.