Yaxın Şərqdə ABŞ-nin bahalı hərbi pilotsuz uçuş aparatı ilə bağlı diqqətçəkən hadisə

15 aprel 2026 184 baxış

Yaxın Şərqdə ABŞ-yə məxsus bahalı hərbi pilotsuz uçuş aparatı ilə bağlı diqqətçəkən hadisə baş verib.

ABŞ Hərbi Dəniz Qüvvələri regionda kəşfiyyat məqsədli "MQ-4C Triton" tipli pilotsuz aparatın itirildiyini rəsmi şəkildə təsdiqləyib.

Məlumata görə, insident aprelin 9-da baş verib və dron qəzaya uğrayıb. Bildirilir ki, şəxsi heyət arasında xəsarət alan yoxdur, lakin əməliyyat təhlükəsizliyi səbəbindən aparatın düşdüyü yer açıqlanmır.

Qeyd olunur ki, "MQ-4C Triton" pilotsuz aparatının dəyəri təxminən 240 milyon dollar təşkil edir.

Əldə olunan məlumatlara görə, dron Hörmüz boğazı üzərində uçuş zamanı qəza siqnalı verib. Daha sonra uçuşunu davam etdirsə də, sistemdə nasazlıq yaranıb və şimal istiqamətində – Bəhreyn yaxınlığında qəfil hündürlük itirib.

Bildirilir ki, aparat qısa müddətdə 16 kilometr yüksəklikdən 3 kilometrə qədər enib və transponderi də sıradan çıxıb. Hadisənin səbəbləri ilə bağlı hələlik rəsmi açıqlama verilməyib.

#Pilotsuz uçuş aparatları