Yəhudi icmasına qarşı terror hücumu planlaşdıranlar kimlərdir?

Böyük Britaniyada yəhudi icmasına qarşı silahlı terror hücumu planlaşdıran, İŞİD ideologiyasından ilhamlanan iki miqrant günahkar bilinib. Polis bu planın həyata keçəcəyi təqdirdə ölkə tarixindəki ən qanlı terror aktlarından biri ola biləcəyini bildirib.

Bu barədə "Daily Mail" məlumat yayıb.

Xəbərdə bildirilir ki, Valid Saadaoui və Amar Hussein Mançester bölgəsində antisemitizmə qarşı keçiriləcək yürüş zamanı iştirakçılara atəş açmağı, daha sonra isə sinaqoqlar və yəhudi məktəblərini hədəfə almağı planlaşdırıblar.

İstintaq materiallarına əsasən, təqsirləndirilən şəxslər 900-dən çox patron və bir neçə avtomatik silah əldə etməyə cəhd göstəriblər. Hüquq-mühafizə orqanlarının məlumatına görə, onlar İsrail-HƏMAS müharibəsini bəhanə edərək Böyük Britaniya ərazisində qisas xarakterli hücum törətmək niyyətində olublar.

Terror planı polis tərəfindən həyata keçirilən gizli əməliyyat nəticəsində vaxtında ifşa edilib. Altı aydan çox müddət ərzində ekstremistlərlə əlaqədə olan undercover əməkdaş onları silahların ölkəyə gətirildiyinə inandırıb. Məlum olub ki, təqdim edilən silahlar deaktiv edilmiş olub.

2024-cü ilin mayında Mançester və ətraf bölgələrdə 200-dən çox polis əməkdaşının iştirakı ilə keçirilən əməliyyat zamanı Saadaoui silahları təhvil almağa gəldiyi anda saxlanılıb. Eyni vaxtda Hussein də həbs edilib. 

Polis bildirib ki, Saadaoui hücum zamanı mümkün qədər çox yəhudini öldürmək niyyətində olub. Polis rəhbərliyinin sözlərinə görə, planlaşdırılan silah və sursatın həcmi hücumun misilsiz faciəyə çevrilə biləcəyini göstərirdi.

Məhkəmə Saadaouinin qardaşı Bilel Saadaouini də terror planı barədə məlumatı gizlətdiyinə görə təqsirli bilib.

11 həftə davam edən məhkəmə prosesindən sonra Saadaoui və Hussein terror aktına hazırlıqda günahkar bilinib. Onları ömürlük həbs cəzası gözləyir.