Yer kürəsi yeni sınaq qarşısındadır? | Mütəxəssislərdən həyəcan təbili - Baku TV

Yer kürəsində yenidən G1 dərəcəli maqnit qasırğasının baş verməsi ehtimal olunur.

Rusiya Elmlər Akademiyasının Kosmik Tədqiqatlar İnstitutunun Günəş Astronomiyası Laboratoriyasının məlumatına görə, hadisənin sentyabrın 9-da müşahidə ediləcəyi gözlənilir.

Mütəxəssislərin proqnozuna əsasən, qarşıdakı günlərdə planetin geomaqnit fonunda zəif dəyişikliklər qeydə alına bilər.

Sentyabrın 7-də vəziyyətin sabit qalacağı, ayın 8-dən etibarən isə ilkin dalğalanmaların başlayacağı bildirilir.

Proqnozlara görə, sentyabrın 9-da Bakı vaxtı ilə saat 13:00-dan etibarən maqnit qasırğasının Yerə təsiri hiss olunmağa başlayacaq. Bununla belə, aktivliyin uzunmüddətli olmayacağı gözlənilir. Axşam saatlarına doğru geomaqnit fonun normallaşacağı və qasırğanın təsirinin zəifləyəcəyi ehtimal edilir.