Zehni fəalliyətimizi aktivləşdirən qoxuların siyahısı | Maraqlı araşdırmanın nəticələri

"Qoxular insan həyatında ilk baxışdan göründüyündən daha mühüm rol oynayır. Onlar əhvali-ruhiyyəyə, konsentrasiyaya, yaddaşa və hətta əmək qabiliyyətinə təsir göstərir".

Bunu rusiyalı nevroloq Qalina Çudinskaya "İzvestiya"ya bildirib.

Mütəxəssisin fikrincə, qoxular müxtəlif təsirlərə malikdir. Məsələn, limon, rozmarin, nanə, reyhan, adaçayı və evkalipt qoxuları konsentrasiyanı artıra və zehni fəaliyyəti aktivləşdirə bilər. Kəklikotu, lavanda və melisa kimi aromatlar isə əksinə, stresin səviyyəsini azaldaraq, əhvali-ruhiyyəni yaxşılaşdıraraq rahatlaşmağa kömək edir.

2017-ci ildə Cənubi Federal Universitetində aparılan maraqlı bir araşdırma portağal efir yağının qoxusunun qısamüddətli vizual yaddaşı əhəmiyyətli dərəcədə yaxşılaşdıra biləcəyini göstərib.

Nevroloq əlavə edib ki, məktəblilər və tələbələr üçün sinif otaqlarında sitrus və ya nanə kimi stimullaşdırıcı qoxuların istifadəsi mənimsəməni yaxşılaşdıra bilər, istirahət yerlərində isə sakit atmosfer yaratmaq üçün rahatlaşdırıcı aromatlardan istifadə etmək yaxşı olar.

Eyni zamanda o qeyd edib ki, qoxu qabiliyyətinin itməsi ‒ anosmiya təkcə fiziki narahatlığa deyil, həm də əhəmiyyətli stresə çevrilə bilər.