Zelenski ağıllı oğlandır... | ABŞ Prezidentindən qalmaqallı sözlər

“Zelenski ağıllı və sərt xarakterli oğlandır”.

Bu sözləri ABŞ Prezidenti Donald Tramp yerli mediaya müsahibəsi zamanı deyib.

“O, Baydenin vaxtında bu ölkədən pul ala bildi. Özü də lap balaca uşağın əlindən konfetini alan kimi bunu etdi. Bu, çox asan idi. Amma mən onun buna görə minnətdar olduğunu düşünmürəm”, – deyə o qeyd edib.

Daha sonra Tramp ənənəvi olaraq “əgər hakimiyyətdə qalsaydım, Rusiya Ukraynaya girməz, HƏMAS 7 oktyabr hadisələrini törətməzdi” ifadələrini işlədib. O, öncəki seçkidə prezidenti seçilsəydi, İranın pis vəziyyətə düşəcəyini deyib. Onun sözlərinə görə, Tehran bu təqdirdə HƏMAS-a, “Hizbullah”a verməyə pul tapmayacaqdı.

Ukrayna ilə razılaşmadan danışan Tramp deyib ki, orada titan və litium kimi nadir metallar var: “Mən bununla bağlı ən yaxşı mütəxəssislərlə söhbət etmişəm. Həmin metallar çox qiymətlidir”.

Əlavə olaraq, Ağ Ev rəhbəri yenə də baş verənlərdə Baydeni təqsirli bilib: “Bayden heç bir halda 350 milyard verməli deyildi. Avropa ilə birgə hərəkət etməliydik.Onlar 100 milyard veriblər, biz isə 350. Avropa Ukraynaya verdiyindən daha çox maliyyəni Rusiya neftini almağa xərcləyib. Yəni, onlar pulu Rusiyaya, biz isə Ukraynaya ayırırıq”.