Zelenskiyə təsir edəcək əsas dövlət hansıdır? - Hindistan təklif etdi ki...

Ukrayna ikinci sülh sammitinin keçirilməsi üçün yer axtarır.

Məsələ bu yaxınlarda Kiyevi ziyafət edən Hindistanın Baş naziri Narendra Modi ilə Ukrayna Prezidenti Volodimir Zelenski arasında da əsas müzakirə mövzusu olub. Hindistan Rusiya-Ukrayna müharibəsində vasitəçiliyi ələ keçirmək üçün sülh sammitinin Dehlidə keçirilməsini təklif edir.

Modi tərəfindən Zelenskiyə məsələ ilə bağlı təklif verilib. Kiyev də Dehlinin bu təşəbbüsünü dəstəkləyir, ancaq Ukrayna hökumətinin bununla bağlı şərti var. Hindistan birinci sülh sammitinin yekun mətninə imzasını atmalıdır. Rəsmi Dehli ilk sammitdə iştirak etsə də, yekun mətni Moskva ilə münasibətləri pozmamaq üçün imzalamayıb. Modi hökuməti savaşda Ukraynanı dəstəklədiyini bildirir, amma Rusiya ilə də əməkdaşlığa xüsusi önəm verir.

Rəsmi Kiyev hazırda sülh sammitinin keçirilməsi üçün Səudiyyə Ərəbistanı, Qətər, Türkiyə və İsveçrə ilə danışıqlar aparır. Ancaq bu dövlətlərlə bərabər Zelenski Hindistanın Rusiyaya təsir imkanlarını nəzərə alaraq sammitin bu ölkədə keçirilməsi üçün hind hökuməti ilə də təmaslarını kəsmir. Ancaq öz mövqeyindən çəkilmək də istəmir.

Bir müddət əvvəl Kiyevə gələn Narendra Modi öncə Polşanı ziyafət edərək Kiyevə Varşavadan dəmiryolu vasitəsilə gəldi. Modi 1992-ci ildən bəri Ukraynaya səfər edən ilk Hindistan lideridir. Polşa üzərindən Ukraynaya gəliş isə Varşavanın Kiyevin təhlükəsizlik arxitekturasındakı danılmaz rolunu göstərir.

Donald Tusk hakimiyyətə yenidən qayıtdıqdan sonra polyak hökuməti Ukraynanin xarici siyasət kursunda əsas aktorlardan birinə çevrilib. İkinci sülh sammitində Zelenski hökumətinin qərarına təsir edəcək əsas dövlətlərdən biri də məhz Polşa olacaq.

Hazırda Ukrayna Prezidenti Polşanın Baş naziri ilə bu barədə təmaslarını davam etdirir. Zelenskinin Çinin prosesdə iştirakını tənqid edərək Pekinin vasitəçilik təklifindən imtinasında da Dehli ilə Kiyev arasında dialoqun mühüm rolunun olduğu ehtimal edilir.

Hindistan və Çin arasında gedən qlobal rəqabət Ukraynadan da yan keçməyib. Artıq Hindistan Ukrayna ilə müəyyən layihələrə start verib. Bütün maneələrə baxmayaraq, Dehli hələlik ikinci sülh sammitinin keçirilməsi üçün əsas məkan olaraq qalır.