11 yaşlı oğlanın faciəvi sonu | Salyanda 1 ailənin 4 üzvü dəhşət yaşadı - Baku TV

Salyan rayonunun Çadırlı kəndində bir ailənin 4 üzvü zəhərlənib. Onlar Şirvan Şəhər Mərkəzi Xəstəxanasına müraciət ediblər.

"Axşam xəstəxanaya gətiriblər. Həkimlər yardım göstərib. Bir az özlərinə gələndən sonra evə buraxılıblar. Evdə uşaq özünü pis hiss edib, götürüb xəstəxanaya gətirdik. Həkimlər nə qədər çalışsalar da, artıq keçinmişdi. Ana, iki qızı və bir oğlu zəhərlənmişdi. Oğlu rəhmətə getdi, qızları isə bura gətirdik ki, nəzarətdə qalsınlar", – mərhumun qohumu bildirib.

Şirvan Şəhər Mərkəzi Xəstəxanasından verilən məlumata görə, fevralın 12-si 3 qadın və 1 kişi olmaqla 4 nəfər zəhərlənmə şübhəsi ilə Təcili tibbi yardım şöbəsinə gətirilib:

“Onlara ilkin tibbi yardım göstərildikdən sonra vəziyyətləri stabil qiymətləndirilib və ambulator müalicə üçün evə buraxılıblar. Ancaq vəziyyəti yenidən pisləşən 2015-ci il təvəllüdlü azyaşlı fevralın 12-si saat 15:00 radələrində xəstəxanaya gətirilib. Həkimlər tərəfindən onun bioloji ölüm faktı təsdiqlənib”.

Hazırda 3 nəfərin müalicəsi Təcili tibbi yardım şöbəsində davam etdirilir. Faktla bağlı araşdırma aparılır.