2 nəfərin qətlində təqsirləndirilən şəxslərin cəzaları dəyişdirildi

Paytaxtın Keşlə qəsəbəsində kütləvi dava zamanı iki nəfərin qətlində təqsirləndirilən və Bakı Ağır Cinayətlər Məhkəməsinin hökmü ilə azadlıqdan məhrum edilən Rauf Hüseynov, Ceyhun İsayev və Ramin İsayevin apellyasiya şikayətinə baxılıb.

Bakı Apellyasiya Məhkəməsində hakim İbrahim İbrahimlinin sədrliyi ilə keçirilən prosesdə hər üç təqsirləndirilən şəxsin cəza müddəti dəyişdirilib.

Məhkəmənin qərarı ilə ömürlük azadlıqdan məhrum edilmiş Rauf Hüseynovun cəzası 20 ilə, 20 il müddətinə azadlıqdan məhrum edilən Ceyhun İsayevin cəzası 19 ilə, onun qardaşı – 5 il müddətinə azadlıqdan məhrum edilən Ramin İsayevin cəzası isə 4 ilə endirilib.

Xatırladaq ki, Bakı Ağır Cinayətlər Məhkəməsinin hakimi Azad Məcidovun verdiyi hökmlə Rauf Hüseynov ömürlük, Ceyhun İsayev 20 il, Ramin İsayev isə 5 il müddətinə azadlıqdan məhrum edilmişdi.

İttiham aktına görə, hadisə 2023-cü il fevralın 11-də Bakının Nizami rayonu ərazisində qeydə alınıb. Kütləvi dava zamanı İlkin Rzayev və Xəyal Rəhimov qətlə yetirilib. Faktla bağlı Rauf Hüseynov və Ceyhun İsayevə, Ramin İsayevə qarşı Cinayət Məcəlləsinin müxtəlif maddələri ilə ittiham irəli sürülüb.