37 yaşlı kişi iynədən ölüb? | Ata dəhşətli hadisə barədə hər şeyi danışdı

Zaqatalanın Muxax kənd sakini, 37 yaşlı Rafael Ramazanov dünyasını dəyişib.

Yaxınlarının sözlərinə görə, o, bir neçə gün əvvəl burun problemləri ilə bağlı Rayon Mərkəzi Xəstəxanasında həkim müayinəsində olub və ona müalicə təyin olunub.

Noyabrın 13-ü tibb bacısı tərəfindən xəstəyə həkimin yazdığı sistem, daha sonra antibiotik iynəsi vurulub. Bundan sonra R.Ramazanovun vəziyyəti pisləşib.

“Tibb bacısı gəlib sistem qoşdu. Bir az keçəndən sonra gördüm ki, ağzından qan gəlir. Yanımdan keçdi, bir də gördüm ki, ağzı aşağı yıxıldı”, – mərhumun atası deyib.

Hadisə yerinə dərhal təcili tibbi yardım briqadası cəlb olunub. Göstərilən zəruri tibbi yardımlara baxmayaraq, R.Ramazanovun həyatını xilas etmək mümkün olmayıb.

Qeyd edək ki, mərhum iki uşaq atası olub. Faktla bağlı Zaqatala Rayon Prokurorluğunda araşdırma aparılır.