Bakıda dəhşət | İş yoldaşını stəkanla öldürən şəxsin məhkəməsində nələr yaşandı?

Bakıda iş yoldaşının başından stəkanla vurub onu öldürməkdə təqsirləndirilən Möhsün Abdullayevin cinayət işi üzrə məhkəmə istintaqı yekunlaşıb.

Bakı Ağır Cinayətlər Məhkəməsinin hakimi Elnur Nuriyevin sədrliyi ilə keçirilən iclasda prokuror çıxışı zamanı təqsirləndirilənin 12 il 6 ay azadlıqdan məhrum edilməsini məhkəməyə təklif edib. Zərərçəkənin hüquqi varisi isə ona daha ağır cəzanın verilməsini məhkəmədən xahiş edib. Müdafiə tərəfi çıxış üçün vaxt istədiyindən növbəti proses dekabrın 5-nə təyin edilib.

Xatırladaq ki, Möhsün Abdullayev Cinayət Məcəlləsinin 120.1-ci (qəsdən adam öldürmə) maddəsi ilə ittiham olunur. İttihama görə o, mübahisə zəminində masanın üzərindəki stəkanla iş yoldaşı Bahadur Tağıyevin başına zərbələr endirib. Bundan sonra o, Bahadur Tağıyevə yumruq və təpik zərbələri də vurub. Ağır xəsarət alan Bahadura görə təcili tibbi yardım çağırılsa da, onun həyatını xilas etmək mümkün olmayıb.