Goranboy sakini Cəbrayılda minaya düşdü

Goranboy sakini Cəbrayılda minaya düşüb. Hadisə rayonun Horovlu kəndi ərazisində baş verib.

Bu barədə Daxili İşlər Nazirliyi, Baş Prokurorluq və Minatəmizləmə Agentliyinin Mətbuat Xidmətinin birgə məlumatında bildirilib.

Qeyd edilir ki, kənd təsərrüfatı sahəsində çalışan 33 yaşlı Goranboy rayon sakini Raqib Nuruyevin idarə etdiyi yük avtomobili minalardan təmizlənməmiş ərazidə tank əleyhinə minaya düşüb. Hadisə nəticəsində sürücü müxtəlif dərəcəli xəsarət alıb.

Faktla bağlı araşdırma aparılır.