“Həbsə girib-çıxır, olan mənə olur” | Dayıoğlu və bibioğlu arasında qalmaqallı hadisə - Baku TV

31 yaşlı paytaxt sakini Kamran Daşdəmirov dələduzluğa məruz qaldığını iddia edir.

K.Daşdəmirovun sözlərinə görə, onu aldadan şəxs öz bibisi oğlu Elmar Rüstəmovdur. K.Daşdəmirov bildirir ki, qohumu ona birgə iş qurmağı, iki avtomobil alaraq qazancı bölüşməyi təklif edib. Lakin sonradan onun avtomobilini razılığı olmadan satıb.

“Mygov”dan bildiriş gələndə gördüm ki, maşın artıq mənim adıma deyil. Əlaqə saxlayanda dedi ki, pul lazım idi, satmışam. Sonra polisə müraciət etdim. Məlum oldu ki, həmin şəxslərin icra şöbəsində çoxsaylı icra sənədləri var. Onlar təkcə mənə deyil, başqa şəxslərə də zərər vurublar”, – deyə Kamran Daşdəmirov vurğulayıb.

Şikayətçinin sözlərinə görə, məsələ ilə bağlı məhkəmə qərarı olsa da, dəymiş ziyan indiyədək ödənilməyib:

“Məsələyə baxılır, məhkəmə qərarları çıxarılır, cərimə və həbs cəzaları tətbiq olunur. Amma nəticədə, zərər mənə dəyir. Elmar hər dəfə pulu bir neçə günə ödəyəcəyini deyir. Artıq dörd aya yaxındır ödəniş etmir”.

Elmar Rüstəmov isə sözügedən iddiaları təkzib edib.

“6030 manat pul ödəmişəm, 1900 manat qalıb. 1900 manata görə məni niyə həbs etsinlər?!”, – o söyləyib.