Kamran Əsədovun məhkəməsində şahidlər dindirilib - Baku TV

Buraxılış və qəbul imtahanlarına qanunsuz texniki vasitə keçirilməsi ilə bağlı cinayət işi üzrə məhkəmə prosesi keçirilib.

Gəncə Şəhər Məhkəməsində hakim Elçin Məmmədovun sədrliyi ilə baş tutan prosesdə şahid qismində tanınan Gültən Quliyeva bildirib ki, Kamran Əsədovun köməkçisi Bəhman Huseynli onunla əlaqə saxlayaraq məhkəməyə getməməyi təklif edib:

“Mənə dedi ki, məhkəməyə getməyim və hər şey yaxşı olacaq. Həmçinin Kamran Əsədov da mənə mesaj yazıb. Lakin mən hər iki şəxsi tətbiq üzərindən bloklamışam. Mən Kamran Əsədova oğlumun qəbul olunması üçün 15 min manat pul vermişəm. İş alınmadı, pulu geri qaytarıb”.

Kamran Əsədov ifadəyə münasibət bildirərkən qeyd edib ki, Gültən Quliyevaya zəng etməyib və hal-əhval üçün mesaj yazıb. Eyni zamanda, Gültən Quliyevadan pul almayıb, pulu onlar özləri verib.

Hakim Elçin Məmmədovun sözlərinə görə, Naftalan Şəhər Polis Şöbəsinə Kamran Əsədov barəsində şikayət daxil olub, araşdırma aparılır.

İş üzrə zərərçəkmiş şəxs qismində tanınan Dövlət İmtahan Mərkəzinin nümayəndəsi Mirzağa Yaqubzadə isə diqqətə çatdırıb ki, Gültən Quliyevanın oğlu imtahanda iki dəfə iştirak edib.

Daha sonra Gültən Quliyevanın oğlu Nihat Quliyev və Kamran Əsədovun köməkçisi Bəhman Huseynli ifadə verərək tərəflərin suallarını cavablayıb.

İş üzrə məhkəmənin növbəti iclası yanvarın 23-nə təyin edilib.