Lənkəranda faciəvi hadisə: dəniz iki can aldı

Lənkəranın Sütəmurdov kəndi yaxınlığında dənizin nəzarətsiz hissəsində faciəvi hadisə baş verib. Belə ki, 5 nəfər boğulma təhlükəsi ilə üzləşib.

Fövqəladə Hallar Nazirliyinin dalğıc-xilasediciləri dərhal axtarışlara cəlb edilib. Xilasedicilər batmaq təhlükəsi ilə üzləşən 5 nəfərdən 2-sini xilas ediblər. 2 nəfərin isə meyiti sudan çıxarılıb. Ümumilikdə 3 nəfərin həyatını xilas etmək mümkün olub.

Məlum olub ki, Bakıdan xalasının evinə qonaq gələn 15 yaşlı Aysu Qəhrəmanzadə, xalası qızı 21 yaşlı Zeynəb Əliyeva ilə dənizə çimməyə gedib. Bu vaxt Aysu boğulma təklükəsi ilə üzləşib, Zeynəb ona kömək etməyə çalışıb. Xalası qızına yardım edə bilməyəcəyini görən Zeynəb ətrafdakıları çağırıb. Bu vaxt yaxınlıqda olan 22 yaşlı Ramin Məmmədzadə özünü onlara çatdırıb və Zeynəbi xilas edib. Daha sonra isə Ramin Aysunu xilas etməyə çalışıb. Lakin özü həyatını itirib.

Xilas edilən Zeynəb Əliyeva Lənkəran Rayon Mərkəzi Xəstəxanasına çatdırılıb. İlkin tibbi yardım göstərilib. Vəziyyəti yaxşıdır. Digər 2 şəxsin vəziyyəti stabil olduğundan onlara hadisə yerində ilkin tibbi yardım göstərilib və evə buraxılıblar.

Ramin Məmmədzadə və Aysu Qəhrəmanzadənin meyitləri Məhkəmə Tibbi Ekspertiza və Patoloji Anatomiya birliyinin Lənkəran Rayon Şöbəsinə təhvil verilib.

Faktla bağlı Rayon Prokurorluğunda araşdırma aparılır.