“Müəllimin adına söz çıxarmışdılar ki...” | Kürdəmirdəki məktəbdə nə baş verib?

Kürdəmir rayonunun Beyi kənd məktəbində insident yaşanıb.

Kənd sakini Hacı Alcanov iddia edir ki, təhsil ocağında bir sıra problemlər var və o buna görə övladlarını məktəbə göndərmir.

“Məktəbə gedib gördüm ki, iki sinfi bir-birinə qatıblar. Buna etiraz etdim. İşə polis qarışdı, beş sutka həbs olundum. Hazırda üç övladım məktəbə getmir. Olanlara görə peşman deyiləm, uşaqlarımın haqqını tələb edirəm”, – deyə o əlavə edib.

Məsələ ilə bağlı sözügedən məktəbdən bildirilib ki, sentyabrın 16-da təhsil müəssisəsinə yaxınlaşan vətəndaş etiraz edib. Məktəb rəhbərliyi tərəfindən vətəndaşa Nazirlər Kabinetinin şagird sayı az olan siniflərin komplektləşdirilməsi ilə bağlı qaydaları izah edilib. Bununla razılaşmayan valideyn xoşagəlməz ifadələrlə təlim-tədris prosesinə maneçilik törədib, pedaqoji kollektivin nüfuzunu aşağı salacaq müxtəlif ittihamlar səsləndirib.

Təhsil müəssisəsinin kollektivinin yazılı müraciəti əsasında hüquq-mühafizə orqanları tərəfindən araşdırma aparılıb və vətəndaşın səsləndirdiyi iddialar təsdiqini tapmayıb.

Kürdəmir Rayon Məhkəməsinin qərarı ilə vətəndaş 2025-ci ilin oktyabrın 29-da beş gün müddətinə həbs edilib. Məktəb rəhbərliyi tərəfindən valideynlə mütəmadi olaraq əlaqə saxlanılır, övladlarının dərsə davamiyyətinin təmin olunması istiqamətində maarifləndirici söhbətlər aparılır.