Pedaqoji Universitetin tələbəsi xəstəxanada öldü | Cəlilabad

Cəlilabadda tələbənin qızılca xəstəliyindən vəfat etməsinə dair xəbər yayılıb.

“Report”un məlumatına görə, rayonun Sabirabad kənd sakini İbayeva Sevil Cabbar qızı yanvarın 4-də Cəlilabad Rayon Mərkəzi Xəstəxanasında dünyasını dəyişib.

Daha sonra Sevil İbayevaya dəqiqləşdirilməmiş pnevmoniya diaqnozu qoyulduğu, onun məhz bu xəstəlikdən vəfat etdiyi bildirilib. Bu barədə "Report"un Muğan Bürosuna TƏBİB-dən məlumat verilib.

Qeyd olunub ki, 2023-cü il dekabrın 30-da rayonun Sabirabad kənd sakini 22 yaşlı gənc qız Cəlilabad Rayon Mərkəzi Xəstəxanasının Reanimasiya şöbəsinə ağır vəziyyətdə hospitalizasiya olunub. Pasiyentə zəruri tibbi yardım göstərilsə də, həkimlərin səylərinə baxmayaraq, o, yanvarın 4-də saat 10:30 radələrində vəfat edib.

Vəfat etmiş Sevil İbayeva Azərbaycan Dövlət Pedaqoji Universitetinin dördüncü kurs tələbəsi idi.