"Qızıl Qaya"da kütləvi zəhərlənmə | Zərərçəkənlər nələr danışdı? - Baku TV

Paytaxtın Nizami rayonu, Mikayıl Əliyev küçəsi, 131 ünvanında yerləşən “Qızıl Qaya” restoranında kütləvi qida zəhərlənməsi baş verib.

Məlumata görə, restoranda keçirilən tədbirin iştirakçıları yeməkdən sonra özlərini pis hiss etməyə başlayıblar. 

Zərərçəkənlərdən biri hadisəni belə təsvir edib:

“Kababa qədər hər şey yaxşı idi. Kabab veriləndən sonra iştirakçıların halı pisləşdi. Dərhal administratora məlumat verdik. O isə iradımıza cavab olaraq bildirdi ki, onlarda heç bir problem yoxdur, hər şey qaydasındadır”.

Digər zərərçəkən isə toyuq ətindən gələn qoxuya diqqət çəkib:

“Ətdən yedim, heç nə hiss etmədim. Sonra toyuğu ağzıma yaxınlaşdıranda dedim ki, bundan iy gəlir. Düşündüm, yəqin ki, çoxlu ədviyyat vurublar, ona görə belədir. Bayıra çıxdım, gördüm, Gülnaz xanım divana uzanıb, halı pisdir. Dedi ki, zəhərlənib. Beş dəqiqə keçməmiş mənim də halım pisləşdi”.

Respublika Təcili və Təxirəsalınmaz Tibbi Yardım Mərkəzindən verilən məlumata görə, hadisə ilə bağlı çağırış ünvanına üç təcili tibbi yardım briqadası göndərilib. Dörd qadın zəhərlənmə şübhəsi ilə Sabunçu Tibb Mərkəzinin nəzdində fəaliyyət göstərən Məhəmmədi Modul Tipli Xəstəxanaya yerləşdirilib.

Qida Təhlükəsizliyi Agentliyindən (AQTA) isə bildirilib ki, hadisənin qeydə alındığı restoranda istifadə olunan qida məhsullarından nümunələr götürülərək laborator müayinələrə cəlb olunub. Hazırda faktla bağlı araşdırma aparılır. Nəticələr barədə əlavə məlumat veriləcək.