Qusarda görünməmiş oğurluq hadisəsi | Saxlanılanlar var

Qusar Rayon Polis Şöbəsinin əməkdaşları rayon ərazisində baş verən oğurluq hadisələrinə qarşı silsilə əməliyyat-axtarış tədbirləri keçiriblər.

Bu barədə Daxili İşlər Nazirliyinin Mətbuat Xidmətinin Quba regional qrupu məlumat yayıb.

Bildirilib ki, daxil olmuş müraciətlə əlaqədar polis əməkdaşları tərəfindən keçirilmiş əməliyyat-axtarış tədbirləri nəticəsində oğurluq hadisəsini törətməkdə şübhəli bilinən rayonun Quxuroba kənd sakini Nurmət Əskərov saxlanılıb.

Araşdırmalar zamanı həmin şəxsin rayon ərazisində olan meyvə bağından ümumi dəyəri 30 000 manat olan su borularını oğurlaması müəyyən edilib.

Polis əməkdaşları tərəfindən keçirilən digər əməliyyat-axtarış tədbirləri zamanı rayon sakinləri – Edik Vəzirov və Ayaz Zərbəliyev saxlanılıblar.

Həmin şəxslərin bağ massivindən ümumi dəyəri 1 800 manatdan çox olan 1 ədəd işıq generatoru və 1 ədəd 2 ton tutumlu plastik su çəni oğurlamaları müəyyən edilib.

Faktlarla bağlı Qusar Rayon Polis Şöbəsində cinayət işi başlanılıb.