Sabiq qərargah rəisinin həbsi ilə bağlı yeni xəbər
Bakı Apellyasiya Məhkəməsində rüşvət almaqda ittiham olunan Bakıdakı “N” saylı hərbi hissənin sabiq qərargah rəisi Vüsal Əliyevin apellyasiya şikayətinə baxılıb.
Məhkəmənin qərarı ilə birinci instansiyanın, yəni Bakı Hərbi Məhkəməsinin hökmü qüvvədə saxlanılıb.
Xatırladaq ki, sabiq qərargah rəisi, kapitan Vüsal Əliyev bir neçə hərbçidən külli miqdarda rüşvət almaqda təqsirləndirilir. 2024-cü ilin fevralında Bakı Hərbi Məhkəməsində hakim Camal Ramazanovun sədrliyi ilə keçirilən prosesdə onun barəsində hökm elan olunaraq 4 il müddətinə azadlıqdan məhrum edilib. Kapitan V.Əliyevə qarşı Cinayət Məcəlləsinin 311.3.2 – təkrar rüşvət alma maddəsi ilə ittiham irəli sürülüb.
Qeyd edək ki, Vüsal Əliyev xidmətlərinə görə müxtəlif medallarla təltif edilib. Həmçinin o, Azərbaycanı Əfqanıstanda təmsil edən zabitlərdən biri olub. Müdafiə tərəfi bunları nəzərə alaraq məhkəmədən V.Əliyevə həbslə bağlı olmayan cəza təyin edilməsini xahiş edib.
Məhkəmə təqsirləndirilən şəxsin xidmətlərini yumşaldıcı hal hesab edib, ona cəza təyin edilərkən Cinayət Məcəlləsinin 62-ci – sanksiya həddinin ən aşağı həddindən az cəza təyinetmə maddəsini tətbiq edib. Hökmə əsasən, Vüsal Əliyev cəzasını ümumi rejimli cəzaçəkmə müəssisəsində çəkəcək.
![icon](/images/loading.png)