Şabranda şagirdlər arasında mübahisə davaya səbəb oldu - Baku TV

Şabranda məktəblilər arasında insident yaşanıb.

Bir neçə məktəbin şagirdi arasında baş verən mübahisə nəticəsində onlardan biri xəsarət alıb. Yaralı Şabran Rayon Mərkəzi Xəstəxanasına gətirilib.

Məlumata görə hadisə şəhər ərazisində baş verib. Mübahisə 4 nömrəli tam orta ümumtəhsil məktəbinin XI sinif şagirdi ilə digər 2 nömrəli texniki fənlər təmayüllü məktəb-liseyinin şagirdi və 5 nömrəli tam orta ümumtəhsil məktəbinin XI sinif şagirdləri arasında yaşanıb. Hadisə nəticəsində 4 nömrəli məktəbin şagirdi müxtəlif dərəcəli bədən xəsarəti alıb.

Xəstəxanaya hospitalizasiya olunan pasiyentə burun sümüklərinin sınığı diaqnozu təyin olunub və ona zəruri tibbi xidmətlər göstərilib. Vəziyyəti qənaətbəxş qiymətləndirilən şəxs ambulator müalicə üçün evə buraxılıb.

Daxili İşlər Nazirliyindən bildirilib ki, baş verən insidentlə bağlı polis əməkdaşları tərəfindən araşdırma aparılır. Hadisə nəzarətə götürülərək müvafiq tədbirlər görülür. Araşdırmanın nəticələrinə uyğun olaraq müvafiq qərar qəbul ediləcək.