Sərxoş sərnişin avtobusda dava saldı | 77-də təhlükəli anlar

Sosial şəbəkələrdə 77 saylı avtobusda sürücü və sərnişin arasında baş verən dava ilə bağlı video yayılıb.

Yaranmış vəziyyətdən şikayətçi olan sərnişin qeyd edib ki, havanın yağıntılı olmasına baxmayaraq, kafelərdən birinin qarşısında dayanan 77 saylı xətt avtobusunda 45 dəqiqə sürücü olmayıb.

45 dəqiqə sonra sürücü ilə birlikdə gələn dispetçer içkili olduğundan avtobusun gecikməsinə etiraz edən sərnişinlərlə mübahisə etməyə başlayıb.

Dayanacaqların birində dispetçer mübahisə edən sərnişinlərin biri ilə avtobusdan düşüb, əlbəyaxa dava etməyə cəhd göstərsə də, onları ayırıblar. Bu zaman sürücü də avtobusdan düşüb, etiraz edən sərnişinlə mübahisə etməyə başlayıb.

Məsələ ilə bağlı xətt üzrə daşıyıcı şirkətin nümayəndəsi Baku TV-yə bildirib ki, yayılan həmin görüntülərdən xəbərdardırlar.

“Məlum olub ki, həmin vaxt 77 saylı xətt üzrə avtobusların qrafikində müəyyən gecikmə müşahidə edilib. Bu zaman avtobus dayanacağa yaxınlaşarkən sərxoş halda olan sərnişinlərdən biri dispetçeri təhqir edərək nəqliyyat vasitəsinə daxil olub. Dispetçer də onu söyən şəxsi avtobusdan endirməyə çalışıb. Baş vermiş hadisəyə sürücünün hər hansı bir aidiyyəti yoxdur”, – deyə daşıyıcı şirkətin nümayəndəsi bildirib.