Tanınmış təhsil eksperti hakim qarşısında | Kamran Əsədov nədə ittiham olunur? - Baku TV

Gəncə Şəhər Məhkəməsində 2025-ci ildə Dövlət İmtahan Mərkəzi tərəfindən keçirilən qəbul və buraxılış imtahanlarına xüsusi vasitələrdən istifadə edərək müdaxilə etməkdə təqsirləndirilən şəxslərin məhkəməsi keçirilib.

Gəncə Şəhər Məhkəməsinin hakimi Elçin Məmmədovun sədrliyi ilə keçirilən prosesdə təqsirləndirilənlərin anket məlumatları dəqiqləşdirilərək onlara hüquq və vəzifələri izah olunub.

Təqsirləndirilən Kamran Əsədov onun haqqında yayıla biləcək informasiyanı əsas gətirərək prosesin qapalı keçirilməsini istəyib. Vəsatət təmin olunmayıb və cinayət işi məhkəmə baxışına verilib. Növbəti proses dekabrın 19-na təyin edilib.

Qeyd edək ki, 2025-ci ildə keçirilən ali təhsil müəssisələrinə qəbul və buraxılış imtahanlarında iştirak edən şəxslərə “Azərbaycan Respublikasının ali təhsil müəssisələrinə tələbə qəbulu Qaydaları”na zidd olaraq köməklik göstərilməsinə dair Dövlət İmtahan Mərkəzindən Dövlət Təhlükəsizliyi Xidmətinə daxil olmuş məlumatlar əsasında başlanmış cinayət işinin ibtidai istintaqı Baş Prokuror yanında Korrupsiyaya qarşı Mübarizə Baş İdarəsində istintaq aparılıb.

İttihama görə, təhsil eksperti Kamran Əsədov və tarix müəllimi Gündüz Abbasov ibtidai istintaqla abituriyent hazırlıq kursu qismində fərdi sahibkarlıq fəaliyyəti ilə məşğul olan şəxsin qəbul və buraxılış imtahanlarının gedişində testləri cavablandırmağa kömək etmək məqsədilə gizli qaydada informasiya alınması (ötürülməsi) üçün nəzərdə tutulan texniki vasitələri qanunsuz olaraq hazırlamasına, habelə cinayət əlaqəsinə girərək həmin texniki vasitələri ümumilikdə 15 nəfərin üzərinə quraşdırmaqla imtahanlarda onlara köməklik göstərmələrinə əsaslı şübhələr müəyyən edilib.