Xaçmazda baş verən bıçaqlanma hadisəsinin təfərrüatı

Martın 2-si Xaçmazda baş verən bıçaqlanma hadisəsi ilə bağlı cinayət işi açılıb.

Bu barədə Xaçmaz Rayon Prokurorluğu məlumat yayıb.

Bildirilib ki, Xaçmaz rayon sakini 1990-cı il təvəllüdlü Kamran Niftəliyevə xəsarətlər yetirilməsi barədə prokurorluğa məlumat daxil olub.

Araşdırma zamanı 1986-cı il təvəllüdlü Faiq Cəbrayılovun martın biri saat 23 radələrində rayonun Qaraqurdlu kəndi ərazisində yerləşən kafelərdən birinin yaxınlığında aralarında yaranmış mübahisə zamanı bıçaqla xəsarətlər yetirərək Kamran Niftəliyevi qəsdən öldürməyə cəhd etməsinə əsaslı şübhələr müəyyən edilib.

Faktla bağlı Xaçmaz Rayon Prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanıb. Faiq Cəbrayılov iş üzrə şübhəli şəxs qismində tutulub. Hazırda cinayət işi üzrə ibtidai istintaq davam edir.