Xəstəxanada 50 minlik mənimsəmə aşkarlandı | Baş Prokurorluqdan açıqlama

Tibbi Ərazi Bölmələrini İdarəetmə Birliyinin tabeliyindəki Mingəçevir Şəhər Mərkəzi Xəstəxanasında mənimsəmə faktı aşkarlanıb, tibb müəssisəsinin vəzifəli şəxsləri barədə cinayət işi başlanılıb.

Mingəçevir Şəhər Prokurorluğundan verilən məlumata görə, xəstəxananın vəzifəli şəxsləri barədə araşdırmalara başlanılıb.

Nəticədə tibb müəssisəsinin vəzifəli şəxslərinin 2021-ci ilin yanvar ayından 2023-cü ilin oktyabr ayınadək olan dövr ərzində vəzifə səlahiyyətlərindən sui-istifadə edərək dövlət büdcəsindən ayrılmış pul vəsaitindən 50 000 manatdan artıq vəsaiti mənimsəməsi faktı aşkarlanıb.

Faktla bağlı Mingəçevir Şəhər Prokurorluğunda Cinayət Məcəlləsinin 179.3.2 (mənimsəmə və ya israf etmə – küllü miqdarda törədildikdə) və 308.1-ci ( vəzifə səlahiyyətlərindən sui-istifadə) maddələri ilə cinayət işi başlanılıb.

Hazırda cinayət işi üzrə istintaq davam etdirilir.