Xəzərdə köməksiz qalan balıqçıları belə xilas etdilər - Baku TV

Xəzərdə köməksiz qalan Azərbaycan vətəndaşları xilas edilib.

Bu barədə Dövlət Sərhəd Xidmətinin mətbuat mərkəzi məlumat yayıb.

Xəbərə görə, Xəzər dənizinin Azərbaycana mənsub ərazi sularında dəniz sərhədlərinin etibarlı mühafizəsi, üzmə vasitələrinə nəzarətin təşkili və xilasetmə tədbirləri uğurla həyata keçirilir.

Dövlət Sərhəd Xidməti Sahil Mühafizəsinin sahil nəzarəti bölməsinə balıqçı qayığının mühərrikində yaranmış problemlə əlaqədar iki nəfər heyət üzvün köməksiz vəziyyətdə qalması barədə məlumat daxil olub. Qayığın və heyət üzvlərinin xilas edilməsi məqsədilə dövlət sərhədinin mühafizəsində olan sərhəd gəmisi koordinatlar üzrə dərhal həmin istiqamətə göndərilib.

Keçirilmiş təxirəsalınmaz tədbirlər nəticəsində dənizdə köməksiz vəziyyətdə qalan Neftçala rayon sakinləri – 1977-ci il təvəllüdlü Faiq Rzayev və 1989-cu il təvəllüdlü Rauf Məhərrəmov sərhədçilər tərəfindən xilas edilərək təhlükəsiz şəraitdə sahilə çıxarılıblar.