AFFA-nın İcraiyyə Komitəsinin iclası keçirilib

Fevralın 19-da SOCAR-ın inzibati binasında AFFA-nın İcraiyyə Komitəsinin növbəti iclası baş tutub.

AFFA-nın prezidenti Rövşən Nəcəfin sədrliyi ilə keçirilən tədbirdə əvvəlcə Peşəkar Futbol Liqasının hesabatı dinlənilib.

Ardınca Premyer Liqanın 2025/2026-cı illər mövsümünün formatı müzakirə edilib. Qərara alınıb ki, 12 komandanın iştirakı ilə keçiriləcək növbəti mövsümün çempionatı 3 dövrədən, yəni 33 turdan ibarət olsun. III dövrənin oyunlarında meydan sahibi olacaq komandalar püşk əsasında müəyyənləşdiriləcək.

Əsasnaməyə uyğun olaraq, cari mövsüm sonuncu yeri tutan komanda Premyer Liqanı tərk edəcək, əvəzində I Liqadan 3 klub birbaşa yüksək dəstəyə vəsiqə qazanacaq.

İcraiyyə Komitəsi həm də 2025/2026-cı illər mövsümündə Premyer Liqada sonuncu yeri tutan klubun I Liqaya enməsi, I Liqanın qalibinin isə birbaşa yüksək dəstəyə vəsiqə qazanması ilə bağlı qərar verib.

Növbəti mövsümdən etibarən Premyer Liqanın daha bir iştirakçısı elitada 11-ci yeri, I Liqada isə 2-ci yeri tutan komandalar arasında neytral meydanda keçiriləcək bir oyundan ibarət pley-off görüşündə müəyyənləşəcək.