AFFA-nın növbəti Hesabat Konfransı təşkil olunub

Aprelin 11-də AFFA-nın növbəti Hesabat Konfransı keçirilib.

Tədbirdə milli komandanın qarşısında duran məqsədlər, Futbolun İnkişafı Strategiyası, o cümlədən uşaq futbolunun və regionlarda bu idman növünün inkişafı məsələsi müzakirə edilməklə yanaşı, AFFA-nın maliyyə hesabatı dinlənilib. Qurumun prezidenti Rövşən Nəcəf bir il ərzində əldə olunan nəticələrin qənaətbəxş olduğunu vurğulayaraq, bununla belə, qarşıda daha böyük hədəflərin olduğunu qeyd edib.

AFFA prezidenti legioner limitinin ləğvinin futbolun inkişafına təkan verəcəyini, futbolumuzun məsuliyyətli və çətin dönəmə qədəm qoyduğunu və AVRO-2028-in seçmə mərhələsində uğurlu çıxışın dəyişməz hədəf olduğunu xatırladıb.

Rövşən Nəcəf Avropa çempionatının seçmə mərhələsində 3, 4 və ya 5-ci yer tutmağın uğur olmadığını, komandamızın final mərhələsində çıxış etməsini istədiyini diqqətə çatdırıb. O həm də danışılmış oyunlar, eləcə də futbola yaraşmayan qeyri-etik davranışlara görə daha sərt cəzaların veriləcəyini bildirib.

Qurumun baş katibi Cahangir Fərəcullayev AFFA-nın oyunçu yetişdirməklə bağlı klublara dəstək olacağını söyləyərək, hazırda infrastruktur baxımından müəyyən sıxıntıların olduğunu və uşaq, eləcə də gənclər liqalarında islahatlar üzərində çalışacaqlarını deyib.

Daha sonra AFFA-nın maliyyə hesabatı dinlənilib. Qeyd olunub ki, qurumun 2024-cü il üzrə xərcləri 33 milyon 448 min 355 manat təşkil edib. Bildirilib ki, ölkəmizdə futbolun inkişafı ilə bağlı ayrılan vəsait 2023/2024 mövsümündə olduğu kimi, cari mövsümdə də 39 milyon manat təşkil edib.

Tədbirin davamında UEFA-nın 2024-cü ildə Azərbaycan klublarına ödədiyi məbləğ açıqlanıb. Ötən il üzrə bu məbləğ 38 milyon 716 min 172 manat təşkil edib. Futbolun və onun idarəetmə sisteminin inkişafına nail olmaq üçün UEFA-nın "Hat-Trick" Həmrəylik proqramları çərçivəsində isə son 2 mövsümdə AFFA-ya ümumilikdə 7 milyon 628 min 995 manat maliyyə vəsaiti ayrılıb.